SOCAR Türkiyənin neft-kimya sektoruna 7 milyard dollar yatıracaq

Azərbaycanın dövlət neft şirkəti SOCAR Türkiyənin neft-kimya sənayesinə təxminən 7 milyard dollar sərmayə qoyacaq. Bu barədə cümə axşamı ölkənin vitse-prezidenti Cevdət Yılmaz Daily Sabah qəzetinə bildirib.

Yılmaz qeyd edib ki, Master Plan çərçivəsində aparılan mühəndislik və texniki-iqtisadi araşdırmalardan sonra qəbul edilən bu layihə Türkiyənin xarici ticarət kəsirinin azaldılmasına və makroiqtisadi sabitliyin möhkəmlənməsinə töhfə verəcək.

SOCAR indiyədək Türkiyə iqtisadiyyatına 18 milyard dollardan çox sərmayə yatırıb və Petkim neft-kimya şirkətinə, habelə İzmirdə yerləşən STAR neft emalı zavoduna sahibdir.

SOCAR Türkiyənin neft-kimya üzrə rəhbəri Kənan Mirzəyev daha əvvəl bildirib ki, yeni layihə poliolefin istehsalını nəzərdə tutur və icrası 5-10 il davam edəcək.

Yılmaz həmçinin Azərbaycanın qazının Türkiyə üzərindən Suriyaya nəqlinə başlanıldığını “kritik tərəfdaşlıq” adlandırıb və bunun müharibədən zərər çəkən ölkəyə elektrik enerjisi təmin edəcəyini vurğulayıb.

O əlavə edib ki, qarşıdakı illərdə Azərbaycan və Türkiyə qaz ixracında əməkdaşlığı dərinləşdirəcək, o cümlədən türkmən qazının tranzitini həyata keçirəcək.

N.Təbrizli