Azərbaycanda elmə gələn il 229 milyon manat ayrılacaq — Deputat

 2026-cı ildə  elmin inkişafına Azərbaycanda 229 milyon manat vəsait nəzərdə tutulub, lakin görüləcək işlərin miqyasına görə bu sahənin dəstəyi daha da gücləndirilməlidir. Bunu millət vəkili Ceyhun Məmmədov bildirib. 

Onun sözlərinə görə, Prezident İlham Əliyevin Milli Elmlər Akademiyasında çıxışı alimlər üçün yeni hədəflər müəyyən edib və dövlət elm sektoruna geniş dəstək nümayiş etdirir.

Məmmədov bir neçə istiqamətə xüsusi diqqət çəkib.

Deputat qeyd edib ki, Elm və Təhsil Nazirliyi son illər təhsilin təkmilləşdirilməsi üçün mühüm addımlar atıb, lakin prosesin daha da sürətləndirilməsinə ehtiyac var. 

O xatırladıb ki, ölkədə hələ də təmiri zəif olan məktəblər mövcuddur və bu problemin qısa müddətdə aradan qaldırılması vacibdir.

Onun sözlərinə görə, icma əsaslı məktəbəqədər təhsil layihələri həyata keçirilsə də, paralel olaraq yeni uşaq bağçalarının inşasına da ehtiyac var. 

“Bağça tam fərqli bir infrastruktur və keyfiyyət tələb edir. Bu sahədə işlər genişləndirilməlidir,” — deputat bildirib.

Məmmədov son illərdə şagirdlərin daşınması sahəsində müəyyən irəliləyişlər olduğunu desə də, xüsusilə Bakıdakı bəzi keçid məktəblərində təhsilin keyfiyyətinin hələ də arzuolunan səviyyədə olmadığını qeyd edib.

Deputat çıxışının sonunda ailə dəyərlərinin ölkədə ciddi təhdidlərlə üzləşdiyini vurğulayıb. Onun fikrincə, ailə institutunun gücləndirilməsi, maarifləndirmə və təbliğat işlərinin genişləndirilməsi dövlətin əsas prioritetlərindən biri olmalıdır.

N.Təbrizli