SOCAR Xəzərə avadanlıq gətirilməsində logistika çətinlikləri üzləşir

Azərbaycanın Xəzər regionunda illər ərzində formalaşdırdığı enerji infrastrukturu ölkənin yeni neft və qaz yataqlarının səmərəli inkişafını mümkün edən əsas amilə çevrilib. Bunu SOCAR-ın vitse-prezidenti Babək Hüseynov bildirib.

Onun sözlərinə görə, AÇG kimi nəhəng layihələrdən sonra bazarda “bir neçə yüz milyon barellik” orta ölçülü yataqlara fokuslanmaq vacibdir.

“Biz əvvəllər milyard barellik ehtiyatlara öyrəşmişdik. Amma bir neçə yüz milyon barel də orta ölçülü yataqdır və onların inkişafına imkan verən infrastrukturumuz artıq mövcuddur”, - Hüseynov deyib.

O bildirib ki, mövcud boru kəmərləri və ixrac marşrutları sayəsində yeni yataqların böyük dəniz platformalarına ehtiyac qalmadan daha effektiv şəkildə işlənməsi mümkündür.

“Sadəcə infrastruktura qoşulmaq kifayətdir. BP ilə belə bir imkan üzərində artıq işləyirik”, — o vurğulayıb.

Vitse-prezident bildirib ki, Azərbaycanın enerji sektorunda ən böyük çağırışlardan biri bəzi bürokratik proseslər və Xəzərə avadanlıq gətirilməsində logistika çətinlikləridir.

“Bəzən çayların su səviyyəsi və nəqliyyat kanallarındakı dəyişikliklər səbəbindən avadanlıq gətirmək çətinləşir. Bu prosesləri idarə etmək mürəkkəbləşib”, —  o qeyd edib.

Hüseynov əlavə edib ki, SOCAR beynəlxalq tərəfdaşlarla birgə müəssisə strukturlarından daha çevik istifadə etməklə bu maneələri azaltmağa çalışır.

“JV mexanizmləri bizə üstünlük verir və SOCAR olaraq həmin çərçivədən daha səmərəli istifadə edirik”- o bildirib.

N.Təbrizli