On bir ayda 41 ölkəyə peyk xidməti ixrac edilib

Azərbaycanın Kosmik Agentliyi “Azərkosmos” 2025-ci ilin yanvar–noyabr aylarında dünyanın 41 ölkəsinə 16,4 milyon ABŞ dolları dəyərində peyk telekommunikasiya xidmətləri ixrac edib. Məlumat İqtisadi İslahatların Təhlili və Kommunikasiya Mərkəzinin icmalında yer alıb.

Bildirilib ki, hesabat dövründə “Azərkosmos”un xidmət ixracından əldə etdiyi gəlir agentliyin ümumi gəlirlərinin 66%-ni təşkil edib.

İcmala görə, 2025-ci ilin noyabr ayında “Azərkosmos” 35 ölkəyə 1,5 milyon ABŞ dolları həcmində peyk telekommunikasiya xidmətləri ixrac edib.

Hesabat dövründə peyk xidmətləri ixracında əsas bazarlar sırasında Birləşmiş Krallıq 4,2 milyon ABŞ dolları ilə ilk yeri tutub. Lüksemburq 3,2 milyon ABŞ dolları ilə ikinci, İsveç 1,1 milyon ABŞ dolları ilə üçüncü olub. Türkiyə (772 min ABŞ dolları) və Nigeriya (759,8 min ABŞ dolları) isə ilk beşliyi tamamlayıb.

Gülnar Nazimqızı