ARDNF-nin aktivləri 2025-ci ildə 22,5% artaraq 73,5 milyard dollara çatıb

Azərbaycan Respublikası Dövlət Neft Fondu (ARDNF) 2025-ci ilin yekunlarına dair açıqladığı məlumata görə, Fondun aktivləri ilin əvvəli ilə müqayisədə 22,5% artaraq 73,5 milyard ABŞ dollarına çatıb.

ARDNF bildirir ki, 2025-ci ilin əvvəlində Fondun aktivləri 60,0 milyard ABŞ dolları təşkil edib, ilin sonuna isə 73,54 milyard ABŞ dollarına yüksəlib. Bu artım əsasən investisiya gəlirləri, maliyyə bazarlarındakı müsbət dinamika və valyuta məzənnələri ilə qızıl qiymətlərindəki dəyişikliklər hesabına baş verib.

Fondun 2025-ci il üzrə ümumi gəlirləri 37,6 milyard manat, xərcləri isə 14,6 milyard manat olub. Həmin dövrdə neft və qaz sazişləri üzrə karbohidrogenlərin satışından əldə olunan gəlirlər 9,5 milyard manat təşkil edib.

ARDNF-nin investisiya portfeli il ərzində 6,2% gəlirlilik göstərib ki, bu da 6,9 milyard manat və ya təxminən 4 milyard ABŞ dolları həcmində investisiya gəliri ilə nəticələnib.

Fondun məlumatına görə, 2025-ci ildə dövlət büdcəsinə ARDNF tərəfindən 14,5 milyard manat vəsait köçürülüb. Bundan əlavə, ali təhsil və gənclərin xaricdə təhsili ilə bağlı dövlət proqramlarının maliyyələşdirilməsinə 105,5 milyon manat yönəldilib, idarəetmə xərcləri isə 40,7 milyon manat təşkil edib.

ARDNF qeyd edir ki, 2025-ci ildə qlobal maliyyə bazarlarında müşahidə olunan faiz dərəcələrinin azalması istiqraz portfelinin gəlirliliyinə müsbət təsir göstərib. Səhm investisiyaları texnologiya və süni intellekt sektorunda irəliləyişlər fonunda artım nümayiş etdirib, daşınmaz əmlak və infrastruktur aktivləri isə ümumilikdə müsbət gəlirlilik təmin edib.

Fondun qızıl portfeli də il ərzində qızıl qiymətlərinin tarixi maksimum səviyyələrə çatması fonunda əhəmiyyətli büdcədənkənar gəlirlər formalaşdırıb.

N.Təbrizli

N.Təbrizli