DYP qeyri-sabit hava ilə bağlı sürücülərə və piyadalara xəbərdarlıq edib

Baş Dövlət Yol Polisi İdarəsi ölkə ərazisində müşahidə olunan əlverişsiz hava şəraiti ilə bağlı hərəkət iştirakçılarına müraciət edib.

Qurumdan verilən məlumata görə, hazırda respublikanın bir sıra bölgələrində külək və yağışla müşayiət olunan qeyri-sabit hava şəraitinin qarşıdakı iki gün ərzində də davam edəcəyi gözlənilir.

Bildirilib ki, baş verə biləcək xoşagəlməz halların qarşısının alınması məqsədilə sürücülərdən yola çıxarkən ehtiyatlı olmaları və yol hərəkəti qaydalarına ciddi riayət etmələri xahiş olunur.

Xüsusilə qoşqulu, tentli və uzunölçülü yük avtomobillərinin sürücülərinə küləkli hava şəraitində daha məsuliyyətli davranmaq, daşınan yüklərin qablaşdırılmasına xüsusi diqqət yetirmək tövsiyə olunub.

DYP həmçinin qeyd edib ki, yağışlı və çiskinli hava şəraitində sürücülər sürət həddinə və ara məsafəsinə nəzarəti artırmalı, nəqliyyat vasitələrinin texniki sazlığını, xüsusilə işıq cihazları və şüşəsilgəclərin işlək vəziyyətdə olmasını təmin etməlidirlər.

Piyadalara isə əlverişsiz hava şəraitini nəzərə alaraq yollarda təhlükəli davranışlardan çəkinmək çağırışı edilib.