Azərbaycanın icmal büdcəsinin gəlirləri 16 milyard manatı ötüb

Bu ilin yanvar-aprel aylarında Azərbaycanın icmal büdcəsinin gəlirləri 16 milyard 2 milyon manat, xərcləri isə 12 milyard 43,4 milyon manat təşkil edib. Bu barədə Maliyyə Nazirliyi məlumat yayıb.
Dörd ayda dövlət büdcəsinin gəlirləri 13 milyard 564 milyon manat olub ki, bu da proqnozdan 0,7% çoxdur. Dövlət büdcəsinin xərcləri isə 10 milyard 933,4 milyon manat təşkil edib və proqnozdan 3,7% az olub.

Hesabat dövründə Dövlət Vergi Xidməti üzrə daxilolmalar 6 milyard 862,5 milyon manat, Dövlət Gömrük Komitəsi üzrə daxilolmalar 2 milyard 32,7 milyon manat təşkil edib.

Əmlak Məsələləri Dövlət Xidməti üzrə daxilolmalar 18,5 milyon manat, sair daxilolmalar 141,2 milyon manat olub.

Dövlət Neft Fondundan dövlət büdcəsinə transfert 4 milyard 280 milyon manat təşkil edib. Büdcədən maliyyələşən təşkilatların ödənişli xidmətlərindən daxilolmalar isə 229,1 milyon manat olub.
Yanvar-aprel aylarında xəzinədarlıq orqanları 376,6 mindən çox ödəniş tapşırığı icra edib.