ITFC Azərbaycanda Rabitəbank və TuranBank-la əməkdaşlığı genişləndirir

Beynəlxalq İslam Ticarət Maliyyə Korporasiyası (ITFC) Azərbaycanda Rabitəbank və TuranBank-la əməkdaşlıq edir və hər banka 10 milyon dollar ayırıb.Bu barədə ITFC nümayəndəsi Bakıda keçirilən İslam İnkişaf Bankı Qrupunun özəl sektor üzrə roadshow tədbirində bildirib.

Onun sözlərinə görə, bu vəsait Azərbaycanda KOB-lara şəriətə uyğun maliyyələşdirilən və maliyyələşdirilməyən ticarət maliyyəsi həllərinin təqdim edilməsi üçün nəzərdə tutulub.

ITFC Azərbaycanda fəaliyyətini son iki ildə yenidən aktivləşdirib. Qurumun ölkə üzrə ümumi maliyyələşdirməsi 103 milyon dollar təşkil edir.

Nümayəndə bildirib ki, ITFC qlobal miqyasda yaradıldığı vaxtdan indiyədək 20 milyard dollara yaxın maliyyələşmə həyata keçirib. Son beş ildə qurumun özəl sektora müdaxilələri 2021-ci ildəki 700 milyon dollardan 2025-ci ildə 1,3 milyard dollara yüksəlib.

Təqdimata əsasən, ITFC maliyyələşməsinin 69%-i üzv ölkələrdə enerji təhlükəsizliyi məqsədlərinə yönəldilir. Qalan hissə ərzaq təhlükəsizliyi, kənd təsərrüfatı və ticarət maliyyəsi layihələrini əhatə edir.

Qurum hökumətlər, dövlət şirkətləri, korporativ müştərilər və özəl sektorla Murabaha maliyyələşməsi, sindikatlaşdırılmış maliyyə, strukturlaşdırılmış ticarət maliyyəsi və ticarət maliyyəsi kredit xətləri vasitəsilə işləyir.

ITFC həmçinin ticarət və islam maliyyəsi üzrə texniki yardım, məsləhət və potensialın artırılması proqramları həyata keçirir.

Azərbaycan 2024-cü ildə istifadəyə verilmiş “Trade Connect Central Asia Plus” proqramında da iştirak edir. Proqram beş Mərkəzi Asiya ölkəsini və Azərbaycanı əhatə edir.

ITFC Azərbaycanda yerli banklarla tərəfdaşlığı genişləndirməyi və KOB-lara inteqrasiya olunmuş islam ticarət maliyyəsi həlləri vasitəsilə dəstəyi artırmağı planlaşdırır.

N.Təbrizli