BDU rektoru: Aqrar sığorta fermerin əməyini və gələcəyini qoruyan mexanizmdir

Bakı Dövlət Universitetinin rektoru Elçin Babayev aqrar sığortanın fermerlərin risklərdən qorunması və kənd təsərrüfatında dayanıqlığın artırılması baxımından mühüm mexanizm olduğunu bildirib.
Babayev bunu BDU-da keçirilən “Risklərə qarşı Aqrar Sığorta Çətiri” konfransında çıxışı zamanı deyib.

Onun sözlərinə görə, kənd təsərrüfatı ölkə iqtisadiyyatı, ərzaq təhlükəsizliyi və regionların inkişafı üçün əsas sahələrdən biridir, lakin dolu, sel, daşqın, quraqlıq, şaxta, güclü külək, zərərvericilər və iqlim dəyişiklikləri bu sahədə ciddi risklər yaradır.

“Aqrar sığorta fermer üçün əlavə xərc kimi deyil, onun əməyini, məhsulunu və gələcəyini qoruyan etibarlı vasitə kimi qəbul edilməlidir”, - Babayev bildirib.

Rektor qeyd edib ki, Azərbaycanda “Aqrar sığorta haqqında” qanunun qəbul edilməsi, Aqrar Sığorta Fondunun yaradılması və sığorta mexanizmlərinin tətbiqi dövlətin aqrar sektora verdiyi önəmin göstəricisidir.

Babayevin sözlərinə görə, iqlim dəyişiklikləri, su ehtiyatlarının azalması və ekstremal hava hadisələrinin artması fonunda aqrar sığortanın əhəmiyyəti daha da artır. Bu şəraitdə elmi əsaslandırılmış qərarlar, monitorinq sistemləri, rəqəmsal texnologiyalar və sığorta alətləri birgə tətbiq olunmalıdır.

O bildirib ki, aqrar sığortanın inkişafında elm və təhsilin rolu xüsusi əhəmiyyət daşıyır. Risklərin elmi əsaslarla öyrənilməsi, torpaq və su ehtiyatlarının qiymətləndirilməsi, rəqəmsal xəritələrin hazırlanması və proqnozlaşdırma modellərinin qurulması bu sahənin inkişafına töhfə verə bilər.
Babayev əlavə edib ki, aqrar sığorta iqtisadiyyat, hüquq, kənd təsərrüfatı, coğrafiya, hidrometeorologiya, ekologiya, informasiya texnologiyaları və data analitikasını birləşdirən sahədir.

Rektorun sözlərinə görə, işğaldan azad edilmiş ərazilərin bərpası dövründə aqrar sığorta və risklərin düzgün qiymətləndirilməsi daha da aktuallaşır. Qarabağ və Şərqi Zəngəzurda kənd təsərrüfatının dirçəldilməsi və dayanıqlı təsərrüfatların yaradılması üçün sığorta mexanizmləri mühüm rol oynayacaq.

Gülnar Nazimqızı