"Qafqaz-Kredit" BOKT 2025-ci ili zərərlə başa vurub; kredit portfeli kiçilib

Qafqaz-Kredit" BOKT 2025-ci ili zərərlə başa vurub; kredit portfeli kiçilib

Azərbaycanın "Qafqaz-Kredit" Bank Olmayan Kredit Təşkilatı (BOKT) MMC 2025-ci maliyyə ilini 26 266 manat xalis zərərlə yekunlaşdırıb. Təşkilatın açıqladığı maliyyə hesabatına görə, BOKT əvvəlki 2024-cü ili 53 563 manat xalis mənfəətlə bağlamışdı.

Şirkətin zərərə düşməsinə əsas səbəb inzibati xərclərin və ehtiyat ayırmalarının artması fonunda əsas əməliyyat gəlirlərinin kəskin azalması olub.

Hesabata əsasən, hesabat dövründə təşkilatın xalis faiz gəlirləri illik müqayisədə 18,8% azalaraq 290 182 manata düşüb. Gəlir bazasının daralmasının əsas drayveri kreditləşmə aktivliyinin zəifləməsi olub: müştərilərə verilmiş xalis kreditlər və avanslar il ərzində 6,6% kiçilərək 1,029 milyon manata enib. Bunun nəticəsində BOKT-un cəmi aktivləri 4,1% azalaraq 1,144 milyon manat təşkil edib.

Gəlirlərin azalması xərclərin artması ilə müşayiət olunub. Belə ki, kreditlər üzrə mümkün zərərlərin ödənilməsi üçün yaradılan ehtiyat xərcləri 18,1% artaraq 47 490 manata, inzibati və digər əməliyyat xərcləri isə 15,6% artaraq 262 901 manata yüksəlib. Digər gəlirlərin 95,2% azalaraq cəmi 639 manata düşməsi də maliyyə nəticələrinə mənfi təsir göstərib. Yekunda BOKT-un vergidənəvvəlki zərəri 28 457 manat təşkil edib (2024-cü ildə 66 954 manat mənfəət olub).

Digər tərəfdən, BOKT borc yükünü əhəmiyyətli dərəcədə azalda bilib — cəmi öhdəliklər 56% azalaraq 16 022 manata düşüb. Eyni zamanda, pul vəsaitləri və onların ekvivalentləri 134,4% artaraq 28 768 manata çatıb ki, bu da kredit bazarına yönəldilməyən sərbəst likvidliyin mövcudluğundan xəbər verir.

Bölüşdürülməmiş mənfəətin azalması fonunda təşkilatın cəmi kapitalı 2,4% geriləyərək 1,128 milyon manat olub. Nizamnamə kapitalı dəyişməyərək 592 000 manat səviyyəsində qalıb.

Təsisçilərin pay bölgüsü isə sabit qalıb: Xalisə Əminova — 33,4%, Arif Qurbanov — 33,3% və Züleyxa Rəsulova — 33,3%.

N.Təbrizli