Azərbaycan iqtisadiyyatına son 20 ildə 350 milyard dollardan çox investisiya yatırılıb - Baş nazir

Son 20 ildə ölkə iqtisadiyyatına 350 milyard ABŞ dollarından çox investisiya yatırılıb və bunun təxminən yarısı xarici sərmayələrin payına düşüb. Bunu baş naziri Əli Əsədov V Daşkənd Beynəlxalq İnvestisiya Forumunda çıxışında bildirib.

Baş nazirin sözlərinə görə, Azərbaycan iqtisadiyyatın açıqlığı və sahibkarlığın təşviqi siyasətini ardıcıl şəkildə davam etdirir.

“Ölkədə investorların hüquqlarının qorunmasını, investisiyaların toxunulmazlığını, kapitalın sərbəst hərəkətini və bazarın bütün iştirakçıları üçün bərabər şəraiti təmin edən müasir qanunvericilik bazası yaradılıb”, - o bildirib.

Əsədov qeyd edib ki, Azərbaycanın Avrasiyanın əsas nəqliyyat marşrutlarının kəsişməsində yerləşməsi ölkənin mühüm rəqabət üstünlüklərindən biridir. Onun sözlərinə görə, son illərdə həyata keçirilən infrastruktur layihələri Azərbaycanı regionun əsas nəqliyyat-logistika mərkəzlərindən birinə çevirib.

Baş nazir əlavə edib ki, ölkə hazırda da dəniz limanlarının, dəmir yolu və avtomobil magistrallarının inkişafına böyük həcmdə investisiya yatırır.

O, yaşıl enerji sektorunu da prioritet istiqamətlərdən biri kimi dəyərləndirib.

“Azərbaycan enerji balansında bərpaolunan enerji mənbələrinin payını artırmaq üçün iddialı hədəflər müəyyənləşdirib. Günəş və külək enerjisi sahəsində iri layihələr həyata keçirilir, aparıcı beynəlxalq şirkətlər cəlb olunur və investorlar üçün yeni imkanlar yaradılır”, - Əsədov vurğulayıb.

Gülnar Nazimqızı