Xarici ticarətində beş ayda 7,2 milyard dollarlıq müsbət saldo qeydə alınıb - AMB

2026-cı ilin yanvar-mayında Azərbaycanın xarici ticarətində 7,2 milyard ABŞ dolları həcmində müsbət saldo formalaşıb. Bu barədə Azərbaycan Mərkəzi Bankı məlumat yayıb.

Qurumun qiymətləndirməsinə görə, 2026-cı ilin sonu üzrə cari əməliyyatlar hesabının profisiti ilə bağlı proqnozun daha da yaxşılaşacağı gözlənilir. Mərkəzi Bank bunu son aylarda qlobal enerji qiymətlərinin yüksəlməsi və qeyri-neft-qaz ixracında müsbət dinamikanın davam etməsi ilə əlaqələndirir.

Mərkəzi Bank bildirib ki, pul siyasəti alətləri maliyyə bazarlarındakı proseslər və bank sistemində likvidlik vəziyyəti nəzərə alınmaqla tətbiq olunur.

Məlumata görə, təminatsız pul bazarında qısamüddətli faiz dərəcələri faiz dəhlizi çərçivəsində və uçot dərəcəsinə yaxın səviyyədə formalaşır. Mart ayının sonundan etibarən AZIR göstəricisinin orta günlük səviyyəsi 6,43-6,44% intervalında olub.

Bank sistemində izafi likvidlik şəraitində Mərkəzi Bank AZIR dərəcəsini uçot dərəcəsinə yaxın saxlamaq məqsədilə əsasən 7 günlük depozit əməliyyatlarından istifadə edir. May ayının sonuna açıq bazar əməliyyatları üzrə sterilizasiya portfelində 7 günlük depozit əməliyyatlarının payı 88,7% təşkil edib.

Gülnar Nazimqızı