Azərbaycanda muzdla çalışanların sayı 1,2% artaraq 1,79 milyona çatıb

Bu il iyunun 1-nə Azərbaycanda muzdla çalışan işçilərin sayı ötən ilin eyni dövrü ilə müqayisədə 1,2% artaraq 1 milyon 790,6 min nəfərə çatıb.

Dövlət Statistika Komitəsinin məlumatına görə, muzdla çalışanların 859,9 min nəfəri dövlət sektorunda, 930,7 min nəfəri isə qeyri-dövlət sektorunda fəaliyyət göstərib. Dövlət sektorunda çalışanların sayı illik müqayisədə 1,5% azaldığı halda, qeyri-dövlət sektorunda məşğulluq 3,85% artıb.

Məlumata əsasən, muzdla çalışanların 18,6%-i ticarət və nəqliyyat vasitələrinin təmiri, 18,1%-i təhsil, 13,8%-i sənaye, 8,6%-i səhiyyə və sosial xidmətlər, 6,6%-i tikinti, 6,1%-i dövlət idarəetməsi, müdafiə və sosial təminat sahələrində çalışıb.

Bundan başqa, işçilərin 4,4%-i nəqliyyat və anbar təsərrüfatında, 4%-i peşə, elmi və texniki fəaliyyət sahəsində, 2,4%-i maliyyə və sığorta sektorunda, 2,3%-i kənd təsərrüfatı, meşə təsərrüfatı və balıqçılıqda, qalan 15,1%-i isə iqtisadiyyatın digər sahələrində məşğul olub.

Gülnar Nazimqızı