Azərbaycanda bank dələduzluqlarının 90%-i telefon zəngləri ilə bağlıdır — AMB

Azərbaycanda bank dələduzluqlarının 90%-i telefon zəngləri ilə bağlıdır — AMB

Azərbaycanda bank sektorunda qeydə alınan dələduzluq hallarının 90%-i vətəndaşlara edilən telefon zəngləri ilə bağlıdır.

Bunu Azərbaycan Mərkəzi Bankının sədr müavini Vüsal Xəlilov bildirib.

Onun sözlərinə görə, dələduzluq hallarının artması maliyyə sektorunun qarşısında duran əsas problemlərdən biridir və bu məsələ bütövlükdə rəqəmsal ekosistemin birgə məsuliyyətini tələb edir.

Xəlilov bildirib ki, Azərbaycanda rəqəmsallaşma ilk olaraq bank sektorunda başlayıb. 2018-ci ildə bank xidmətlərinin rəqəmsallaşma səviyyəsi 26% olduğu halda, hazırda bu göstərici 86%-ə çatıb.

Onun sözlərinə görə, son araşdırmalara əsasən, bank əməkdaşlarının 30%-dək hissəsi rəqəmsallaşma ilə bağlı sahələrdə çalışır.

Xəlilov qeyd edib ki, Mərkəzi Bank birbaşa vətəndaşlara çoxsaylı xidmətlər təqdim etməsə də, özəl sektor üçün məhsul və sistemlərin yaradılması üzərində işləyir.

O əlavə edib ki, kibertəhlükəsizlik sahəsində ciddi müsbət nəticələr əldə olunub.

Gülnar Nazimqızı