Fərid Məmmədov: Süni intellekt insanlara daha çox dəyər yaratmaq imkanı verməlidir

Süni intellekt və rəqəmsallaşma insanların rutin işlərdən azad olunaraq daha çox dəyər yaradan fəaliyyətlərə fokuslanmasına xidmət etməlidir. Bunu “PAŞA Maliyyə Holdinq”in baş icraçı direktoru Fərid Məmmədov “Baku ID 2026” innovasiya festivalında çıxışı zamanı deyib.

O bildirib ki, süni intellektə yalnız texnologiya təşəbbüsü kimi deyil, istedad və insan təşəbbüsü kimi yanaşmaq lazımdır.

“Texnologiya imkan yaradan bir vasitədir. İnsan üstəgəl texnologiya korporasiyalar üçün həqiqətən vacib və dəyərli bir şey yaradacaq”, - Məmmədov deyib.

Onun sözlərinə görə, süni intellektdən istifadə üç əsas istiqamətdə nəzərdən keçirilməlidir. Bunlardan birincisi daha bilikli təşkilata çevrilmək, ikincisi məhsuldarlığı artırmaq, üçüncüsü isə innovasiyanı təşviq etməkdir.

Məmmədov qeyd edib ki, bu gün biliyə çıxışın xərci demək olar ki, sıfıra yaxın olsa da, həmin bilikdən düzgün istifadə etmək, mühakimə yürütmək və qərar vermək üçün insan kapitalına və təlimə ciddi investisiya tələb olunur.

“Bu gün ‘ağıllı istedad’ adlandırdığımız şey gələcəkdə orta istedad göstəricisi olacaq. Lakin biz buna çatmaq üçün çox səy göstərməli və insanlara buna necə nail olacaqlarını öyrətməliyik”, - o vurğulayıb.

Şirkət rəhbəri bildirib ki, süni intellekt və rəqəmsallaşma insanların gündəlik rutin və baza dəyəri yaratmayan tapşırıqlardan azad olunmasına, yeni iş üsullarının tətbiqinə və daha yüksək dəyər yaradan fəaliyyətlərə yönəlməsinə imkan verir.

Onun sözlərinə görə, insanların daha bilikli və məhsuldar olması, rutin işlərdən azad edilməsi innovasiya imkanlarını da genişləndirir.

“Bu, həm proseslərdə artan innovasiyadır, həm də yeni biznes sahələrinin, yeni kanalların kəşf edilməsidir”, - Məmmədov deyib.

O əlavə edib ki, süni intellekt yalnız xərclərin azaldılması və optimallaşdırma vasitəsi kimi istifadə olunmamalı, innovasiyaya keçid üçün də imkan yaratmalıdır.

Aytac Zeynalova