BP Milli İncəsənət Muzeyində 5 zalı yeniləyib – 100-ə yaxın rəsm əsəri nümayiş olunacaq

BP-nin dəstəyi ilə Azərbaycan Milli İncəsənət Muzeyində ümumi sahəsi 450 kvadratmetr olan 5 zal yenidən qurulub və müasir texnologiyalarla təchiz edilib. Layihə çərçivəsində muzey fondlarında saxlanılan 100-ə yaxın rəsm əsəri daimi və müvəqqəti ekspozisiyalarda nümayiş etdiriləcək. Bu barədə BP-nin Xəzər regionu üzrə vitse-prezidenti Bəxtiyar Aslanbəyli bildirib .

Onun sözlərinə görə, şirkət Azərbaycandakı fəaliyyətini yalnız neft-qaz layihələri ilə məhdudlaşdırmır.
 

BP təhsil, mədəniyyət və sosial sahələrdə həyata keçirdiyi layihələrlə ölkənin ictimai həyatına töhfə verməyə çalışır. Son illər şirkət mədəni irsin qorunması və təbliği istiqamətində həyata keçirdiyi layihələrin sayını artırıb. Bu istiqamətdə Azərbaycan Respublikasının Mədəniyyət Nazirliyi ilə əməkdaşlıq edilir və layihələr nazirliyin tövsiyələri nəzərə alınmaqla həyata keçirilir",- o vurğulayıb.

Bəxtiyar Aslanbəyli vurğulayıb ki, yeni layihədə immersiv texnologiyalardan istifadə olunması onu pilot layihəyə çevirir. Layihə uğurlu olacağı təqdirdə, bu təcrübənin gələcəkdə digər mədəniyyət ocaqlarında da tətbiqi nəzərdən keçirilə bilər.

O, layihənin həyata keçirilməsində göstərdiyi dəstəyə görə Mədəniyyət Nazirliyinə, muzey rəhbərliyinə və icraçı Nargis Solutions şirkətinə təşəkkürünü bildirib.

Aytac Zeynalova