İranın neft nazirinin Azərbaycana səfərindən GÖZLƏNTİLƏR

İranın neft naziri Cavad Ovcinin iyunun 2-3-də Azərbaycana rəsmi səfər edəcəyi gözlənilir. 

Mütəxəssislər, bu səfərlə bağlı iki ölkə arasında hər hansı müqavilənin bağlanmasının gözlənilmədiyini bildirir.

İqtisadçı-ekspert İhlam Şabanın sözlərinə görə, ölkələr arasında yeni müqavilələrin imzalanması üçün, əvvəlcə İrana tədbiq edilən sanksiyalar götürülməlidir.

"Mən bu səfərlə bağlı hansısa müqavilənin imzalanacağını gözləmirəm. Çünki real olaraq, bu mümkün deyil. Azərbaycanın İranla yalnız qonşuluq və humanitar əlaqələri var. Yəni, Azərbaycan tərəfi bunu dəfələrlə qeyd edib", – o bildirib.

Şabanın fikrincə, Azərbaycanın İran ilə qonşuluq və humanitar müstəvidə saxladığı münasibətləri, onun üzərinə götürdüyü beynəlxalq öhdəliklərə xələl gətirə bilməz.

İqtisadçı  Pərviz Heydərovun sözlərinə görə, səfər zamanı iki ölkə arasında yanacaq-energetika sahəsi ilə bağlı müəyyən razılaşmalar əldə oluna bilər.

"Azərbaycanın İran ilə olan iqtisadi əməkdaşlıq münasibətləri əsasən Naxçıvan vasitəsilə həyata keçirilir. Bu əməkdaşlıqlar tək İran üçün yox, həm də Azərbaycan tərəfi üçün də maraqlıdır.  Azərbaycanın Zəngəzur dəhlizi ilə bağlı layihədə, İran Erməsintanla Azərbaycan arasında vasitəçi ola bilər”, – o qeyd edib.


www.anews.az