Xocalı soyqırımı hələ də Türkiyə tərəfindən rəsmi şəkildə tanınmayıb - Səidə Ekmen

Xocalı soyqırımı hələ də Türkiyə dövləti tərəfindən rəsmi şəkildə tanınmayıb. Bunu Türkiyə Vəkillər Kollegiyaları Birliyinin İnsan Hüquqları Komissiyasının üzvü, vəkil Səidə Ekmen  noyabrın 5-də Bakıda keçirilən XXI əsrdə dövlət suverenliyi və milli konstitusiyalar: qlobal çağırışlar, tendensiyalar və perspektivlər — “2025: Konstitusiya və Suverenlik İli” çərçivəsində beynəlxalq elmi-praktiki konfransda çıxışı zamanı bildirib.

“Mən bu məsələni dəfələrlə Türkiyə Böyük Millət Məclisində gündəmə gətirmişəm. Lakin təəssüf ki, bu günə qədər Türkiyə Xocalı soyqırımını rəsmən tanımayıb,” –  Ekmen vurğulayıb.

Ekmenin sözlərinə görə, bu mövzu təkcə siyasi deyil, həm də insan hüquqları və ədalət məsələsi kimi qiymətləndirilməlidir. O qeyd edib ki, 1992-ci il fevralın 26-da baş verən Xocalı faciəsi zamanı 600-dən çox dinc azərbaycanlı, o cümlədən qadınlar və uşaqlar qətlə yetirilib.

“Türkiyə və Azərbaycan ortaq tarixə və dəyərlərə malikdir. Bu faciənin hüquqi və mənəvi cəhətdən tanınması qardaşlıq münasibətlərinin bir hissəsidir,” –  o əlavə edib.

Xocalı faciəsi 1992-ci ilin fevralında Ermənistan silahlı qüvvələrinin hücumu nəticəsində baş verib.

Türkiyədə isə bu məsələ ictimai və siyasi səviyyədə geniş müzakirə olunsa da, hələlik rəsmi parlament qərarı qəbul edilməyib.

Gülnar Nazimqızı