Müdafiə xərclərinə əlavə 47 milyon manat ayrılır

Azərbaycan Milli Məclisinin müzakirəyə çıxardığı 2026-cı il dövlət büdcəsi layihəsinə əsasən, müdafiə və milli təhlükəsizlik, hüquq-mühafizə xərclərinə 47,8 milyon manat, ərzaq və qida təhlükəsizliyi çərçivəsində heyvanlar arasında yoluxucu xəstəliklərə qarşı peyvəndləmə işlərinə 3 milyon manat əlavə vəsait yönəldilməsi təklif olunur. Bu barədə deputat Azər Əmiraslanov məlumat verib. 

Bundan əlavə, bəzi dövlət orqanlarının fəaliyyətinin təşkili və maddi-texniki təminatının yaxşılaşdırılması üçün 1,2 milyon manat ehtiyac yaranıb.

Təklif olunan əlavə xərclərin cəmi 52 milyon manat təşkil edir və büdcənin mövcud ehtiyatları hesabına maliyyələşdiriləcək.

Eyni zamanda, bəzi təşkilatların xərclərinin optimallaşdırılması məqsədilə iqtisadi təsnifata uyğun olaraq 13,2 milyon manat məbləğində maddələrarası yerdəyişmələrin aparılması nəzərdə tutulur. Dövlət investisiya proqramı üçün 2026-cı ildə 2,7 milyard manat vəsait planlaşdırılıb.

Dəyişikliklər yenilənmiş büdcə layihəsinin 1-ci, 7-ci və 9-cu maddələrinə daxil edilib.

Gülnar Nazimqızı