Əliyev: Azərbaycan heç vaxt toqquşma yeri olmayacaq, əməkdaşlıq məkanı olacaq

Azərbaycan  heç vaxt geosiyasi qarşıdurma meydanına çevrilməyəcək və regional və qlobal əməkdaşlıq üçün açıq platforma olaraq qalacaq.

Dövlət başçısı İlham Əliyev bu fikirləri ABŞ Ticarət Palatasının beynəlxalq üzvlərlə əlaqələr, Yaxın Şərq və Türkiyə üzrə baş vitse-prezidenti Kuş Çoksinin rəhbərlik etdiyi nümayəndə heyəti ilə görüşdə səsləndirib.

Əliyev Azərbaycanda formalaşdırılmış əlverişli investisiya mühitinə diqqət çəkərək, son 20 ildə ölkəyə təxminən 350 milyard ABŞ dolları həcmində sərmayə cəlb olunduğunu bildirib. Onun sözlərinə görə, ölkənin ölçüsü və əhali sayı nəzərə alındıqda bu, “son dərəcə böyük göstəricidir”.
Prezident vurğulayıb ki, Azərbaycan uzun illərdir bp, ExxonMobil, Baker Hughes, Boeing, Apple, J.P. Morgan, Visa, Mastercard, Coca-Cola, Ericsson və Marriott kimi iri beynəlxalq şirkətlərlə əməkdaşlıq edir və bu əməkdaşlıq qarşılıqlı etimada əsaslanır.

“Biz sərmayədarların etimadını qorumuşuq. 30 il əvvəl imzalanmış pay bölgüsü sazişlərində belə bir söz dəyişdirilməyib,” – Əliyev bildirib.

O qeyd edib ki, Azərbaycan bir çox ölkə ilə strateji tərəfdaşlıq sənədləri imzalayıb və bəzən bu ölkələr bir-biri ilə münasibətdə olmasa belə, Bakı əməkdaşlıq üçün neytral platforma rolunu oynayır.

“Azərbaycan heç vaxt toqquşma yeri olmayacaq, əməkdaşlıq məkanı olacaq. Hər kəs üçün imkanlar var,” – prezident bildirib.

Əliyev əlavə edib ki, Azərbaycan və ABŞ arasında münasibətlər yeni və müsbət mərhələyə daxil olub və tərəflər şirkətlər arasında birbaşa əlaqələrin genişləndirilməsində maraqlıdır.

X.Əliyeva