İlham Əliyev və Meloni mətbuata bəyanatlarla çıxış ediblər - Yenilənib

Azərbaycan Prezidenti İlham Əliyev və İtaliyanın Baş naziri Ciorcia Meloni bazar günü Bakıda keçirdikləri görüşdən sonra mətbuata bəyanatlarla çıxış ediblər.

Əliyev bildirib ki, Azərbaycan və İtaliya strateji tərəfdaşdır və ikitərəfli münasibətlər yüksək səviyyədə inkişaf edir. Onun sözlərinə görə, İtaliya Azərbaycanın əsas ticarət tərəfdaşı olaraq qalır və iki ölkə arasında ticarət dövriyyəsi təxminən 12 milyard dollar təşkil edib.

Prezident qeyd edib ki, əməkdaşlığın əsas istiqamətlərindən biri enerji sahəsidir. O bildirib ki, Azərbaycan İtaliyanın əsas enerji təchizatçılarından biridir və tərəflər qaz ixracının artırılması üçün Cənub Qaz Dəhlizi çərçivəsində layihələrin genişləndirilməsini müzakirə ediblər.

Əliyev həmçinin hərbi-texniki əməkdaşlıq, investisiyalar və İtaliya şirkətlərinin Azərbaycanda, o cümlədən Qarabağ və Şərqi Zəngəzurda fəaliyyəti kimi sahələrdə əməkdaşlığın genişləndirilməsi planlarını qeyd edib.

Meloni isə bildirib ki, iki ölkə arasında münasibətlər son illərdə yeni mərhələyə keçib və əməkdaşlıq yalnız enerji ilə məhdudlaşmır. O, 2026-cı ilin ikinci yarısında Bakıda Azərbaycan–İtaliya biznes forumunun keçirilməsinin planlaşdırıldığını açıqlayıb.

İtaliya baş naziri əlavə edib ki, enerji əməkdaşlığı ölkəsinin enerji təhlükəsizliyində mühüm rol oynayır və tərəflər sənaye tərəfdaşlığının genişləndirilməsi üzərində də işləmək niyyətindədir.

Tərəflər həmçinin regional məsələləri, o cümlədən Azərbaycan-Ermənistan münasibətlərinin normallaşması və digər beynəlxalq mövzuları müzakirə ediblər.

***

Prezident İlham Əliyev və İtaliya Nazirlər Şurasının sədri Ciorcia Meloni mətbuata bəyanatlarla çıxış edirlər.Bu barədə Prezidentin Mətbuat Xidməti məlumat yayıb.