İsrail Prezidenti İlham Əliyevi təbrik edib

İsrail Prezidenti İsxak Hersoq Azərbaycan Prezidenti İlham Əliyevə Müstəqillik Günü münasibətilə təbrik məktubu göndərib.

Məktubda İsrail dövlət başçısı Azərbaycan xalqına sülh və rifah arzulayıb, Bakı ilə Təl-Əviv arasında strateji əhəmiyyət daşıyan münasibətlərin İsraildə yüksək qiymətləndirildiyini bildirib.

Hersoq iki ölkə arasında əlaqələrin yalnız siyasi sahə ilə məhdudlaşmadığını, xalqlar arasında da səmimi dostluq münasibətlərinin mövcud olduğunu qeyd edib.

O, Prezident İlham Əliyevlə açıq və səmimi dialoqa böyük önəm verdiyini vurğulayaraq, ilin əvvəlində Davosda keçirilən görüşü yüksək qiymətləndirdiyini bildirib.

İsrail Prezidenti məktubunda regional çağırışlara toxunaraq qeyd edib ki, Azərbaycan və İsrail mürəkkəb geosiyasi şəraitdə sabitliyin əsas dayaqlarından biri kimi çıxış edir.

Hersoq, həmçinin enerji sektoru başda olmaqla iqtisadi əməkdaşlıq sahəsində əldə olunan irəliləyişləri müsbət qiymətləndirib və ikitərəfli əlaqələrin gələcəkdə daha da möhkəmlənəcəyinə ümid etdiyini ifadə edib.