Azərbaycan enerji sistemini Aİ ilə birləşdirəcək - Fon der Lyayen

Azərbaycan enerji sistemini Avropa İttifaqının enerji şəbəkəsi ilə birləşdirəcək. Bu barədə Avropa Komissiyasının sədri Ursula fon der Lyayen iyulun 1-də Bakıda Prezident İlham Əliyevlə birgə mətbuata bəyanat zamanı bildirib.

Fon der Lyayen deyib ki, Rusiya qazının Avropaya tədarükünün azalmasından sonra Azərbaycan Aİ-nin enerji təhlükəsizliyinin təmin edilməsində mühüm rol oynayıb və "Cənub Qaz Dəhlizi" uğurlu əməkdaşlıq nümunəsinə çevrilib.

"İndi biz növbəti mərhələdəyik", – o bildirib.

Onun sözlərinə görə, Azərbaycan bərpa olunan enerji də daxil olmaqla yeni enerji layihələrini inkişaf etdirir və Xəzər regionunun potensialı ölkənin təmiz elektrik enerjisinin ixracı üçün mühüm enerji qovşağına çevrilməsinə imkan yaradır.

Fon der Lyayen bildirib ki, Aİ regional enerji şəbəkələrinin inteqrasiyası üzrə planları dəstəkləyir və Azərbaycanın enerji sisteminin Avropa İttifaqının şəbəkəsinə qoşulması əlavə qaz ixracı imkanları da yaradacaq.

O əlavə edib ki, Avropa İttifaqı Azərbaycanın Azərbaycan və Ermənistan arasında elektrik kabelinin çəkilməsi təşəbbüsünü də dəstəkləyir və bunu regionun gələcək enerji inteqrasiyası baxımından mühüm addım hesab edir.