Qazaxıstan və Azərbaycan BTC ilə neft daşımalarını artırmağı planlaşdırır - Tokayev

Qazaxıstan və Azərbaycan Bakı-Tbilisi-Ceyhan (BTC) boru kəməri ilə Qazaxıstan neftinin nəqlini artırmağı planlaşdırır. Bunu Qazaxıstan Prezidenti Kasım-Jomart Tokayev Bakıda AQEM-in tədbirində bildirib.

“Azərbaycanla birlikdə Bakı-Tbilisi-Ceyhan boru kəməri ilə Qazaxıstan xam neftinin daşınmasını artırmaq niyyətindəyik”, - Tokayev deyib.

O, nəzərdə tutulan həcmi və artımın hansı müddətdə həyata keçiriləcəyini açıqlamayıb.

Tokayev enerji təchizatı zəncirlərində fasilələrin və kritik infrastruktura qarşı risklərin artdığını bildirərək, Xəzərin regional və qlobal enerji təhlükəsizliyində əhəmiyyətinin yüksəldiyini vurğulayıb.

“Qazaxıstan qəti şəkildə inanır ki, Xəzər dənizi regionun və onun hüdudlarından kənardakı bütün xalqların xeyrinə sülh və əməkdaşlıq məkanı olaraq qalmalıdır”, - o əlavə edib.

Gülnar Nazimqızı