Tokayev süni superintellekt üzrə BMT çərçivəsində beynəlxalq müqaviləni dəstəkləyib

Qazaxıstan Prezidenti Kasım-Jomart Tokayev süni superintellektin tənzimlənməsi üzrə BMT-nin himayəsi altında beynəlxalq müqavilənin hazırlanmasını dəstəkləyib.

Bakıda AQEM-in tədbirində çıxış edən Tokayev Vaşinqtonda bu yaxınlarda imzalandığını bildirdiyi superintellekt haqqında sazişi alqışlayıb.

“Mahiyyət etibarilə, bu sənəd Birləşmiş Millətlər Təşkilatının himayəsi altında beynəlxalq müqavilə üçün əsas ola bilər. Hesab edirəm ki, AQEM bu prosesə böyük töhfə verə bilər”, — o deyib.

Tokayev süni intellektin imkanlarının beynəlxalq hüquqi tənzimləmə mexanizmlərindən daha sürətlə inkişaf etdiyini bildirib və etimad tədbirlərinin rəqəmsal sahəyə də şamil olunmasına çağırıb.

“Mənim fikrimcə, AQEM mövcud beş fəaliyyət istiqamətinə süni intellekti də əlavə etməlidir”, - Qazaxıstan Prezidenti vurğulayıb.

O, Vaşinqtonda imzalandığını bildirdiyi sənədin iştirakçılarını və hüquqi statusunu açıqlamayıb.

Qazaxıstan Prezidenti Kasım-Jomart Tokayev böhranların qarşısının alınması üçün AQEM çərçivəsində preventiv diplomatiya mexanizminin yaradılmasını təklif edib.

“Praktik addım kimi preventiv diplomatiya mexanizmini işə salmağı təklif edirik. Sülhü böhranlar yaranmamışdan əvvəl qurmaq daha yaxşıdır”, — Tokayev  deyib.

Onun sözlərinə görə, böhranların qarşısının alınması artıq başlamış münaqişələrin idarə edilməsindən daha səmərəli və daha az xərc tələb edən yanaşmadır.

Tokayev bildirib ki, yeni mexanizm hər bir üzv dövlətə qərarların qəbulunda sistemli iştirak imkanı yaradacaq və siyasi bəyanatların əlaqələndirilmiş fəaliyyətə çevrilməsinə kömək edəcək.

O, AQEM-i BMT və digər beynəlxalq təşkilatlarla əməkdaşlıq şəraitində Asiyada və onun hüdudlarından kənarda fikir ayrılıqlarının aradan qaldırılmasında daha fəal rol oynamağa çağırıb. Mexanizmin strukturu və yaradılma müddəti açıqlanmayıb.

N.Təbrizli