“Amazon” süni intellektlə işləyən smartfon üzərində işləyir

ABŞ-nin “Amazon.com Inc.” şirkəti Transformer kod adlı mobil telefon hazırlayır. Bu barədə “Reuters” agentliyi mənbələrə istinadən xəbər verib.

Məlumata əsasən, yeni telefonun səs köməkçisi olan “Alexa” ilə sinxronlaşa biləcəyi və fərdiləşdirmə hesabına Amazon.com üzərindən məhsulların, eləcə də Grubhub kimi tərəfdaşlardan yeməklərin sifarişini, həmçinin Prime Video və Prime Music kimi striminq platformalarından istifadəni asanlaşdıracağı ehtimal edilir.

Mənbələrin sözlərinə görə, layihənin əsas məqsədlərindən biri süni intellekt xüsusiyyətlərinin inteqrasiyasıdır. Bu, ənənəvi tətbiq mağazalarına olan ehtiyacı aradan qaldıra bilər.

Agentliyin mənbələri qeyd edib ki, “Alexa” cihazın əsas elementinə çevriləcək, lakin onun əsas əməliyyat sistemi fərqli ola bilər.