Türkiyədə 100-dən çox futbolçu mərc oyunlarına görə cəzalandırılıb

Türkiyə Futbol Federasiyası (TFF) mərc oyunlarında iştirakı aşkar olunan 102 futbolçuya qarşı intizam tədbirləri görüb. Bu barədə NTV xəbər verib.

“Qalatasaray”ın oyunçusu Eren Elmali 45 gün, Metehan Baltacı 9 ay, “Konyaspor”dan Ndao isə 12 ay müddətinə oyundan kənarlaşdırılıb. Digər futbolçular da müxtəlif cəzalar alıblar.

Araşdırmalara görə, təxminən 600 futbolçu, məşqçi və menecer Albaniya, Bolqarıstan və Şimali Kipr üzərindən fəaliyyət göstərən qanunsuz mərc saytlarında iştirak edib. İş üzrə “İnterpol” da prosesə cəlb olunub.

Daha əvvəl TFF 149 peşəkar hakimi oyunlara mərc etmə halları səbəbindən 8 aydan 1 ilə qədər oyundan uzaqlaşdırmışdı.