Yunanıstan 12 diplomatını, Portuqaliya 10 rus konsulluq əməkdaşını ölkədən çıxarır

 

Buna səbəb  Vyana Konvensiyasının müddəalarına uyğun olaraq və onların fəaliyyəti milli təhlükəsizliyə zidd olduğu üçün qərar qəbul edilib.

Belə ki, Yunanıstan Xarici İşlər Nazirliyi Rusiyanın Yunanıstandakı diplomatik və konsulluq nümayəndəliklərinin 12 əməkdaşını persona non-qrata elan etdiklərini bildirib.

 

"Yuxarıda qeyd olunanlar 1961-ci il Diplomatik Münasibətlər haqqında Vyana Konvensiyasının və 1963-cü il Konsulluq Münasibətləri haqqında Vyana Konvensiyasının şərtlərinə əsasən arzuolunmaz hesab edilib”, - deyə məlumatda bildirilir.

 

Bu gün səhər saatlarında nazirliyin baş katibi bu qərarla bağlı Rusiya səfirini məlumatlandırıb. Portuqaliya Respublikasının Xarici İşlər Nazirliyi bildirib ki, dünən günortadan sonra ölkə hökuməti bu diplomatik missiyanın "fəaliyyətləri milli təhlükəsizliyə zidd olan” 10 əməkdaşını persona non-qrata elan etmək qərarı barədə Rusiya Federasiyasının səfirini xəbərdar edib.

 

Onların Portuqaliya ərazisini tərk etmək üçün iki həftə vaxtı olacaq. Portuqaliya hökuməti Rusiyanın Ukrayna ərazisinə təcavüzünü qətiyyətlə pislədiyini bəyan edib.

 

 Almaniya, Fransa, İtaliya, Danimarka, İsveç, Rumıniya və Sloveniya da daxil olmaqla bir sıra Avropa ölkələri daha əvvəl rus diplomatlarını ölkədən çıxardıqlarını elan etmişdilər. Bu qərarlar Kiyevin rus işğalçılarının Kiyev vilayətində, xüsusən də Buçada vəhşilikləri barədə dərc etdiyi məlumatdan sonra qəbul edilib.