40.000 adam zorla Rusiya ərazilərinə göndərilib - Mariupol meri

Onun sözlərinə görə, deportasiya olunanların sayı bələdiyyə uçotunun köməyi ilə müəyyən edilib.

Rusiya mülki əhalinin məcburi köçürülməsində hər hansı əli olduğunu inkar edir.

Media müharibə şəraitində Ukrayna hakimiyyətinin məlumatlarını müstəqil şəkildə yoxlaya bilmir.

Kiyev ukraynalıların Rusiyaya deportasiyasından demək olar ki, müharibənin lap əvvəlindən danışır. 

Prezident  Zelenski martın sonunda rusiyalı jurnalistlərinə müsahibəsində bunu adam oğurluğu adlandırıb.

İndiyədək sosial şəbəkələrdə deportasiya edilmiş ukraynalıların deportasiya yerlərindən və ya yolda qaçıb Rusiyanı tərk etməyi bacaranların təsdiqlənməmiş hekayələri artıq yayılmaqdadır.

 

Bu arada Pentaqonun sözçüsü Con Kirbi bildirib ki, Rusiya hərbçilərinin Mariupolda fəallığı zəifləmir, lakin şəhərin ukraynalı müdafiəçiləri xətti saxlamaqda davam edirlər.

"Biz onların hava hücumlarına qarşı qurğularının və artilleriyasının Donbasda və Ukraynanın cənubunda, xüsusən də Mariupol ətrafında və daxilində cəmləşdiyini görməkdə davam edirik”, - Kirbi bildirib.

Pentaqonun sözçüsünə görə, Rusiya komandanlığı Ukraynanın şərqində daha geniş hücumlar üçün şərait yaradır.

ABŞ ordusu yaxın vaxtlarda Ukrayna əsgərlərinə təlim keçməyə hazırdır. Xüsusilə, təlim ABŞ-ın təqdim etdiyi ən son artilleriya qurğularından istifadəni əhatə edəcək.

Çərşənbə axşamı ABŞ prezidenti Co Bayden Ukraynadakı hadisələrlə bağlı avropalı müttəfiqləri ilə telefonla məsləhətləşmələr aparacağını bildirib.

Ağ Ev hələlik danışıqlarda hansı ölkələrin liderlərinin iştirak edəcəyini dəqiqləşdirməyib.

"Prezident tərəfdaşlarla təhlükəsiz videozənglər keçirəcək, bu zaman tərəflər Ukraynanı dəstəkləmək üçün növbəti addımları müzakirə edəcək, həmçinin Rusiyanı məsuliyyətə cəlb etmək üçün birgə səylər barədə razılığa gələcəklər”, - ABŞ administrasiyasının bəyanatında deyilir.