Rusiyadan 48 nəfər və 8 şirkət Aİ-nin yeni sanksiyalarına məruz qala bilər

Aİ-nin yeni sanksiyalar siyahısına 47 fiziki və səkkiz hüquqi şəxs, o cümlədən Rusiyaya keçmiş ukraynalı siyasətçilər, bir sıra sahibkarlar və hərbçilər daxil ola bilər, bu barədə Reuters sənəd layihəsinə istinadən xəbər verir.

Mənbə yazır ki, xüsusilə Ural Mədən-Metallurgiya Şirkəti və onun baş direktoru Andrey Kozitsyn Aİ-nin qara siyahısına düşə bilər.

Bundan əlavə, "Gecə qurdları” motoklubunun bir neçə lideri və onların lideri Aleksandr Zaldostanov, həmçinin klubun daha üç üzvü də sanksiyalara məruz qala bilər.  KİV-in məlumatına görə, onlar "Rusiya dövlət təbliğatına fəal dəstək”, "Ukraynanın dövlətçilik hüququnun inkarı” və "denazifikasiya” çağırışlarına görə siyahıya salınıblar.

 Moskva meri Sergey Sobyanin, aktyorlar Sergey Bezrukov və Vladimir Maşkov, həmçinin Rostec dövlət korporasiyasının rəhbəri Sergey Çemezov da sanksiyalar siyahısında ola bilər. Məhdudiyyətlər bəzi "rus oliqarxlarının əvvəllər sanksiyalara məruz qalmış qohumlarına” da şamil oluna bilər. Sanksiyalar paketi həmçinin bəzi gəmiçilik və silah firmalarının, "Yunarmiya” hərəkatının və "Russkiy Mir” Fondunun fəaliyyətini qadağan edəcək.

İqtisadi tədbirlərdə Aİ "Rusiyanın enerji resurslarından sonra ən əhəmiyyətli ixracatını təşkil edən qızılın birbaşa və ya dolayı yolla idxalını, alınmasını və ya transferini qadağan etməyə” hazırlaşır.

KİV-in məlumatına görə, Aİ ərzaq tədarük edən Rusiya şirkətlərini məhdudiyyətlərdən kənarlaşdırmaq üçün əvvəlki sanksiyaları dəqiqləşdirməyi planlaşdırır.


www.anews.az