Görüşlə bağlı konkret razılaşma yoxdur - Peskov

Ağ Ev rəhbəri Donald Trampın Ukrayna münaqişəsinin həlli üçün Rusiyaya səfəri ilə bağlı hələlik konkret razılaşma yoxdur. Bunu Rusiya prezidentinin mətbuat katibi Dmitri Peskov jurnalistlərlə keçirdiyi brifinqdə deyib. 

“Hələlik heç bir konkret razılaşma yoxdur”, - o bildirib. 

Kremlin sözçüsü qeyd edib ki, Putin və Tramp dünənki telefon danışığı zamanı təmasları davam etdirəcəkləri və diqqəti ayrıca görüşə yönəldəcəkləri barədə razılığa gəliblər və köməkçilərə görüşə hazırlıqla bağlı işə başlamaq tapşırılıb.

Putinlə Tramp arasında telefon danışığı fevralın 12-də baş tutub və təxminən bir saat yarım davam edib. Söhbət zamanı liderlər Ukraynada hərbi əməliyyatların dayandırılmasının zəruriliyini müzakirə ediblər  və münaqişənin həlli üçün dərhal danışıqlara başlamaq barədə razılığa gəliblər. ABŞ prezidentinin sözlərinə görə , o, rusiyalı həmkarından münaqişənin daimi əsaslarla həll edilməsinin zəruriliyi barədə eşidib.

Tramp daha sonra Səudiyyə Ərəbistanında Putinlə şəxsən görüşməyi planlaşdırdığını açıqlayıb. Onun sözlərinə görə, əsas qarşılıqlı əlaqə telefonla baş tutacaq, lakin ilk üz-üzə görüş böyük ehtimalla orada baş tutacaq. O, həmçinin Səudiyyə Ərəbistanının vəliəhd şahzadəsi Məhəmməd bin Salman Əl Səudun danışıqlarda iştirakını istisna etməyib.

Aytac