Paşinyan sürücülük vəsiqəsini imtahansız alıb

Ermənistanın baş naziri Nikol Paşinyan cümə axşamı hökumət iclasında çıxış edərək sürücülük vəsiqəsini imtahan vermədən aldığını etiraf edib.

“Təbii ki, mən rüşvət verməmişəm. O vaxt sürücülük vəsiqəsini aldığım zaman artıq tanınmış jurnalist idim,” –  Paşinyan bildirib.

O əlavə edib ki, həmin illərdə o, “diz çöküb yalvarsa belə”, rəsmi şəkildə imtahan vermək imkanına sahib olmazdı.

“İmtahan şöbəsinə 300 metr belə getməyə macal tapmamışdım ki, mənə vəsiqəni gətirdilər, verdilər və dedilər: ‘tez buradan get’,” –  Ermənistanın baş naziri vurğulayıb.

Paşinyan bu əhvalatı danışarkən Ermənistan iqtisadiyyatının müxtəlif sahələrində ixtisaslı kadr çatışmazlığı problemini qeyd edib və bir çox sürücünün vəsiqəni pul qarşılığında əldə etdiyini xüsusi vurğulayıb.

N.Təbrizli