"Rus evi" Bakıda fəaliyyətini bərpa etmək üçün yollar axtarır -Yevgeni Primakov

Rusiya Azərbaycanda Rus evinin bərpa olunması üçün bütün kompromis axtarışları davam etdirir. Bu barədə Rusiya mətbuatı  “Rossotrudniçestvo”nun rəhbəri Yevgeni Primakova istinadla yazıb. 

"Hazırda mədəni-humanitar diplomatiya ilə bağlı işləri əsasən Rusiya səfirliyi həyata keçirir. Eyni zamanda, biz Azərbaycan tərəfi ilə kompromis axtarmaqda davam edirik. Mənə elə gəlir ki, həm Azərbaycan tərəfi, həm də biz konstruktiv və kifayət qədər nikbinliklə yanaşırıq ki, hələ də belə bir kompromis tapacağıq və tammiqyaslı iş bərpa olunacaq", - Primakov bildirib.

Bundan əvvəl Rusiya xarici işlər nazirinin sözçüsü Maria Zaxarova söyləyib ki, Rusiya Bakıdakı “Rus Evi” ətrafında yaranmış vəziyyətin həlli ilə bağlı təkliflərini Azərbaycan tərəfinə çatdırıb və konstruktiv qarşılıqlı yanaşma gözləyir.

Əvvəlcə rəsmi Bakı  “Rossotrudniçestvo” təşkilatının Azərbaycandakı nümayəndəliyinin hüquqi şəxs kimi qeydiyyatdan keçmədiyini və təşkilatın ölkə qanunvericiliyini ciddi şəkildə pozduğunu açıqlayıb.

 Bunun ardınca  fevralın 3-də “Rus Evi”nin fəaliyyətinin dayandırılması ilə bağlı Rusiyaya nota göndərilib.

Azərbaycan Xarici İşlər Nazirliyinin məlumatında bildirilir ki, ölkə ərazisində bu cür təşkilatların fəaliyyəti milli qanunvericiliyə, dövlətlərarası qarşılıqlı prinsipə və ikitərəfli əsasda əldə edilən razılaşmalara uyğun şəkildə tənzimlənir.

Bakıda fəaliyyət göstərən "Rus evi" fəaliyyətini dayandırıb. 

Gülnar