Kiyev Papa Fransiskin dəfn mərasimi zamanı sammit keçirməyi təklif edib

Ukrayna, Roma Papası Fransiskin dəfn mərasimi ilə əlaqədar dünya liderlərinin İtaliyaya səfərindən istifadə edərək, Rusiya ilə münaqişənin həlli üzrə sammitin təşkili ilə bağlı İtaliya və digər əsas Aİ müttəfiqlərinə müraciət edib. Bu barədə İtaliyanın La Repubblica qəzeti yazır.

Məqaləyə görə, Ukrayna diplomatik kanallar vasitəsilə İtaliyaya və digər Avropa tərəfdaşlarına daha geniş formatda Ukrayna üzrə sammitin keçirilməsi təşəbbüsü ilə çıxış edib. Söhbət təkcə ABŞ və Ukrayna prezidentləri – Donald Tramp və Volodimir Zelenski arasında danışıqlardan deyil, həm də ABŞ, İtaliya, Fransa, Böyük Britaniya və ehtimal ki, Almaniyanın daxil olduğu “Kvint” formatında görüşdən gedir.

Qeyd olunur ki, Almaniya hökuməti kansler Olaf Şoltsun dəfn mərasimində iştirak etmək üçün Romaya gedəcəyini və burada bir sıra ikitərəfli görüşlər keçirə biləcəyini təsdiqləyib.

ABŞ prezidenti Donald Trampın isə aprelin 25-də axşam saatlarında İtaliyaya çatacağı və aprelin 26-da yerli vaxtla saat 10:00-da keçiriləcək vida mərasimində iştirak edəcəyi bildirilir. Ağ Ev Trampın rəsmi görüşləri ilə bağlı hələlik açıqlama verməsə də, diplomatik mənbələrə əsasən, ən azı üç ikitərəfli görüş – Zelenski, Fransa prezidenti Emmanuel Makron və Böyük Britaniyanın baş naziri Kir Starmer ilə – nəzərdə tutulur.