İranda qadın nazirin Bakı səfərindən sonra qalmaqal yaranıb

İranın nəqliyyat və şəhərsalma naziri Fərzanə Sadəq Məlvacərd hava limanında çantasının yoxlanılmasından imtina etdiyinə görə ölkədə “Ərdəbilqeyt” adlandırılan siyasi qalmaqalın mərkəzinə çevrilib.

Prezident Məsud Pəzəşkianın kabinetində yeganə qadın nazir olan Sadəq, Bakıda Azərbaycan, Rusiya və İran nümayəndələrinin “Şimal–Cənub” nəqliyyat dəhlizi üzrə görüşündə iştirak etdikdən sonra təyyarə ilə deyil, quru yolla Ərdəbilə qayıdıb.

Gömrükçülərin məlumatına görə, o, çantasının yoxlanmasına razı olmayıb və qəzəblə hava limanını tərk edərək “bu hava limanının qapılarını bağlatdıracağam” deyib.

Hadisədən bir gün sonra Ərdəbil hava limanının direktoru Məhəmməd Kəsəbi vəzifədən azad edilib.

Lakin İran Hava Limanları və Naviqasiya Şirkəti bu qərarın insidentlə əlaqəsi olmadığını bildirib.

Mühafizəkar deputatlar hadisə ilə bağlı araşdırma tələb edib, reformist media isə bunu qadın naziri hədəf alan siyasi hücum kimi qiymətləndirib.

Ekspertlərin fikrincə, qalmaqal ölkədəki islahatçılar və mühafizəkarlar arasında gedən mübarizənin tərkib hissəsidir.

Rəsmi mənbələr isə bildiriblər ki, “sionist yönümlü media” bu hadisəni Bakıya uğurlu səfəri və “Şimal–Cənub” layihəsində əldə olunan irəliləyişi gözdən salmaq üçün şişirdib.

Nazirin çantasında nə olduğu hələ də məlum deyil. Lakin analitiklər hesab edir ki, onun vəzifədən uzaqlaşdırılması ehtimalı azdır, çünki bütün nazirlər ali lider Ayətullah Xameneyinin təsdiqi ilə təyin olunur.

N.Təbrizli