ABŞ Sülh İnstitutunun adı Donald Trampın şərəfinə dəyişdirilib

ABŞ Dövlət Departamenti Vaşinqtonda yerləşən ABŞ Sülh İnstitutunun (USIP) adını prezident Donald Trampın şərəfinə dəyişdiyini açıqlayıb. Qərar instituta 40 ilə yaxın müddətdə ilk dəfə belə dəyişiklik edilməsi ilə diqqət çəkib.

Dövlət Departamenti X platformasında yayımladığı bəyanatda Trampı “ölkə tarixində ən böyük danışıqlar aparan şəxs” adlandıraraq quruma “Donald Tramp Sülh İnstitutu” adının verildiyini bildirib. Paylaşımda binanın üzərinə yeni adın yazıldığı foto da təqdim olunub.

CNN-in məlumatına görə, Tramp administrasiyası bu ilin əvvəlində büdcə ixtisarlarına görə institutu faktiki olaraq bağlamışdı.

ABŞ Sülh İnstitutu 1984-cü ildə Konqres tərəfindən beynəlxalq münaqişələrin həlli üçün yaradılmışdı və dövlət tərəfindən maliyyələşdirilən nadir qeyri-partiya tədqiqat qurumlarından biri sayılır.

Aytac