Tramp İrana xəbərdarlıq edib: Etirazçılar öldürülərsə, “çox güclü” zərbələr olacaq

İranda etirazlar zamanı nümayişçilərin öldürülməsi halında Vaşinqton Tehrana qarşı “çox güclü” zərbələr endirəcək. Bunu ABŞ prezidenti Donald Tramp bildirib.

“Onlara açıq şəkildə bildirdim ki, əgər adətən iğtişaşlar zamanı etdikləri kimi insanları öldürməyə başlasalar, biz onlara çox sərt zərbə vuracağıq. Artıq onlarla insan ölüb. Biz vəziyyəti çox diqqətlə izləyirik,” –  Tramp vurğulayıb.

ABŞ prezidentinin sözlərinə görə, etirazlar genişmiqyaslıdır və izdihamlar çox böyükdür.

 “Onlar izdihamın içindədirlər. Amma bilirlər ki, bunu etsələr, ağır bədəl ödəyəcəklər”, - Tramp deyib.

Tramp həmçinin qeyd edib ki, İran hakimiyyəti üçün vəziyyət “çox pis gedir”.

Son həftələr İranda sosial-iqtisadi problemlər fonunda etiraz aksiyaları intensivləşib. ABŞ administrasiyası daha əvvəl də Tehranı insan haqlarının pozulmasına görə sərt tənqid edib və mümkün cavab addımları barədə xəbərdarlıqlar səsləndirib.

Aytac