ABŞ Qəzza zolağında atəşkəs müşahidə missiyasını dayandırır - KİV

ABŞ İsraildə yerləşən və Qəzza zolağı üzrə atəşkəsə nəzarət, eləcə də humanitar yardımın koordinasiyası üçün yaradılmış Mülki-Hərbi Koordinasiya Mərkəzinin (CMCC) fəaliyyətini dayandırmağı planlaşdırır.Bu barədə Reuters mənbələrə istinadən xəbər verir.

Qərar ABŞ-ın Qəzza üzrə irəli sürdüyü və hazırda dalana dirənmiş sülh planı fonunda qəbul edilir.

Mənbələrin bildirdiyinə görə, planın həyata keçirilməsinə İsrailin davam edən hərbi əməliyyatları və HƏMAS-ın silahı yerə qoymaqdan imtinası mane olur.

Qərara əsasən, mərkəzin funksiyalarının ABŞ komandanlığı altında yaradılması nəzərdə tutulan beynəlxalq sabitləşdirmə missiyasına verilməsi planlaşdırılır. ABŞ hərbi personalının sayının təxminən 190 nəfərdən 40 nəfərə endirilməsi, digər vəzifələrin isə xarici ölkələrin mülki mütəxəssisləri tərəfindən icra olunması gözlənilir.

Eyni zamanda, strukturun yenidən təşkil edilərək “Beynəlxalq Qəzzaya Dəstək Mərkəzi” adı ilə fəaliyyətini davam etdirəcəyi ehtimal olunur.