ABŞ İran neftinin Çinə satışına görə yeni sanksiyalar tətbiq edib

ABŞ administrasiyası İran neftinin Çinə tədarükünü asanlaşdırmaqda ittiham olunan üç fiziki şəxsə və BƏƏ, Honkonq və Omanda qeydiyyatdan keçmiş doqquz şirkətə qarşı yeni sanksiyalar tətbiq edib.

Reutersin yaydığı məlumata görə, ABŞ Maliyyə Nazirliyi bildirib ki, məhdudiyyətlər əsasən İslam İnqilabı Keşikçiləri Korpusunun Çin bazarında neft satışından gəlir əldə etməsinə yardım edən şəbəkələri hədəf alır.

ABŞ-ın maliyyə naziri Scott Bessent bildirib ki, Prezident Donald Trump administrasiyası İranın nüvə proqramı, silahlanma və regional müttəfiqlərinin maliyyələşdirilməsi üçün istifadə etdiyi gəlir mənbələrini məhdudlaşdırmaq siyasətini davam etdirəcək.

Bundan əlavə, United States Department of State İİKK-nın maliyyə mexanizmləri barədə məlumat verənlər üçün 15 milyon dollara qədər mükafat elan edib.

Məlumat Vaşinqtonun Pekinlə yüksək səviyyəli danışıqlara hazırlaşdığı dövrə təsadüf edir.

Reuters yazır ki, Trampın Çin lideri Xi Jinpinglə görüşündə İran məsələsi və Hörmüz boğazında nəqliyyat təhlükəsizliyinin əsas mövzulardan biri olacağı gözlənilir.

Bu arada, CNNə danışan mənbələrə görə, Tramp administrasiyası Tehranla aparılan danışıqlardan narazıdır və Ağ Evdə hərbi variantın yenidən gündəmə gəlməsi ehtimalı artır. Məlumata əsasən, ABŞ xüsusilə Hörmüz boğazında mümkün blokada riskindən narahatdır. Bu boğaz vasitəsilə dünya neftinin təxminən 20%-i və LNG tədarükünün 30%-ə yaxını daşınır.

CNN-in məlumatına görə, Tramp İranın son nüvə təklifini “cəfəngiyat” adlandıraraq onu zəif razılaşma kimi qiymətləndirib. Bununla belə, mənbələr ABŞ prezidentinin hələ yekun qərar vermədiyini və 12 mayda planlaşdırılan növbəti danışıqlardan əvvəl mövqeyini dəqiqləşdirə biləcəyini bildiriblər.

 ABŞ və İran arasında münasibətlər son aylarda Hörmüz boğazında təhlükəsizlik, İranın nüvə proqramı və Yaxın Şərqdə artan gərginlik fonunda yenidən kəskinləşib. Vaşinqton Tehranı regional silahlı qrupları dəstəkləməkdə ittiham edir, İran isə sanksiyaların ləğvini tələb edir.

Gülnar Nazimqızı