Tramp İrana sabah zərbə endirilməsi planlarından imtina edib

ABŞ Prezidenti Donald Tramp Qətər, Səudiyyə Ərəbistanı və BƏƏ liderlərinin müraciətindən sonra mayın 19-na planlaşdırılan İrana qarşı hərbi zərbəni təxirə salıb.Bu barədə o, “Truth Social” hesabında paylaşım edib.

Trampın sözlərinə görə, Qətər əmiri Şeyx Təmim bin Həməd Al Tani, Səudiyyə Ərəbistanının vəliəhd şahzadəsi Məhəmməd bin Salman və BƏƏ Prezidenti Məhəmməd bin Zayed Əl Nəhyan Vaşinqtondan hücum planını dayandırmağı xahiş ediblər. O bildirib ki, buna səbəb İranla bağlı davam edən danışıqlardır.

ABŞ lideri qeyd edib ki, tərəflər Vaşinqtonun, eləcə də Yaxın Şərq ölkələrinin qəbul edə biləcəyi razılaşmanın əldə olunacağına inanırlar.

Tramp əlavə edib ki, ABŞ Müdafiə Nazirliyinə planlaşdırılan hücumu dayandırmaq tapşırığı verib. Onun sözlərinə görə, mümkün razılaşma İranın nüvə silahı hazırlamaqdan imtina etməsini nəzərdə tutur.

Bununla yanaşı, Tramp bildirib ki, razılaşma əldə olunmasa, ABŞ qüvvələri İrana qarşı “tammiqyaslı” hücuma hazır saxlanılacaq.