Rusiya Ermənistandan daha bir məhsulun idxalını dayandırdı

Rusiyanın Baytarlıq və Fitosanitar Nəzarət üzrə Federal Xidməti – “Rosselxoznadzor” Ermənistandan idxal olunan “Cermuk” mineral sularında bikarbonat ionu, xlorid və sulfatların normadan artıq olduğunu əsas gətirərək məhsulun idxalına müvəqqəti sanitar məhdudiyyət tətbiq edib.

“Rossiya 24” telekanalına danışan qurum rəhbəri Sergey Dankvert bildirib ki, məhsulun etiketində göstərilən məlumatlarla tərkibi arasında uyğunsuzluq aşkarlanıb.

Onun sözlərinə görə, mineral suyun müalicəvi xüsusiyyətləri barədə yanlış məlumat istehlakçılarda sağlamlıq problemlərinə və səmərəsiz müalicəyə səbəb ola bilər.

“Rosselxoznadzor” həmçinin Ermənistandan Rusiyaya meyvə-tərəvəz tədarükü ilə bağlı problemlərin davam etdiyini açıqlayıb.

Qurumun məlumatına görə, Rusiya müfəttişləri hazırda Ermənistanda yoxlamalar aparır və istixanalarda monitorinqlər davam edir. Əlavə qərarların yoxlamaların nəticəsindən sonra veriləcəyi bildirilib.