11 Avropa ölkəsi rusiyalı turistlər üçün Şengen qaydalarının sərtləşdirilməsini istəyir

Yay turizm mövsümü ərəfəsində azı 11 Avropa ölkəsi Avropa İttifaqını (Aİ) rusiyalı turistlərin Şengen zonasına giriş qaydalarını sərtləşdirməyə çağırıb.

Baltikyanı ölkələr, həmçinin Çexiya, Danimarka, Finlandiya, Niderland, Polşa və İsveçin nazirləri, eləcə də Aİ üzvü olmayan İslandiya və Norveçin nümayəndələri bu tələbi Aİ-nin xarici siyasət üzrə ali nümayəndəsi Kaja Kallas və Avropa Komissiyasının daxili işlər və miqrasiya məsələləri üzrə komissarı Magnus Brunner ünvanladıqları birgə məktubda irəli sürüblər.

Məktubda Rusiyaya münasibətdə mövcud viza siyasətinin yenidən nəzərdən keçirilməsi və Şengen məkanına turist səfərləri ilə bağlı qaydaların sərtləşdirilməsi tələb olunur.

Bununla belə, təşəbbüsə qoşulmayan bəzi Aİ ölkələrinin nümayəndələri məsələyə ehtiyatla yanaşmağa çağıraraq, mümkün məhdudiyyətlərin nəticələrinin diqqətlə qiymətləndirilməsinin vacibliyini vurğulayıblar.

Avropa İttifaqı Rusiyanın Ukraynaya qarşı müharibəsindən sonra Moskva ilə viza rejimini əhəmiyyətli dərəcədə sərtləşdirib. 2022-ci ildə Aİ və Rusiya arasında viza sadələşdirilməsi sazişinin tətbiqi dayandırılıb ki, bu da rusiyalı vətəndaşlar üçün viza alınması prosesini daha uzun və daha bahalı edib. Bir sıra Aİ ölkələri daha sonra milli səviyyədə əlavə məhdudiyyətlər tətbiq edərək rusiyalı turistlərin ölkələrinə girişini məhdudlaşdırıb. Yeni təşəbbüs isə Şengen məkanı üzrə vahid yanaşmanın formalaşdırılmasına yönəlib.

Gülnar Nazimqızı