ABŞ və İran arasında memorandum Tramp, Vens və Qalibaf tərəfindən imzalanıb

ABŞ Prezidenti Donald Tramp, vitse-prezident Cey Di Vens və İran parlamentinin sədri Məhəmmədbaqer Qalibaf Vaşinqton və Tehran arasında hərbi əməliyyatların dayandırılmasını nəzərdə tutan anlaşma memorandumunu imzalayıblar. Bu barədə yüksək vəzifəli ABŞ rəsmisinə istinadən Reuters məlumat yayıb.

"Axios"un müxbiri Barak Ravid də ABŞ rəsmilərinə istinadən bildirib ki, sənəd ABŞ tərəfdən Tramp və Vens, İran tərəfdən isə Qalibaf tərəfindən imzalanıb.

Qalibaf "X" sosial şəbəkəsində paylaşımında İranın “yekun qələbəyə doğru böyük addım atdığını” bildirib və ölkəsinin öz mövqeyində möhkəm dayandığını qeyd edib.

İran Prezidenti Məsud Pezeşkian isə bəyan edib ki, danışıqlar aparan nümayəndə heyəti ölkə rəhbərliyinin müəyyən etdiyi siyasətdən kənara çıxmayacaq. Onun sözlərinə görə, bütün addımlar milli maraqlar və dövlətin müəyyənləşdirdiyi çərçivə daxilində atılacaq.

Pezeşkian daha əvvəl qeyd etmişdi ki, ABŞ və İran arasında razılaşdırılmış memorandumun müddəaları tam icra olunarsa, bu, regionda yeni siyasi şəraitin formalaşmasına imkan yarada bilər.

ABŞ rəsmilərinin məlumatına görə, sənədin rəsmi imzalanma mərasimi daha sonra keçirilsə də, tərəflər artıq memorandumu elektron formada təsdiqləyiblər.