CENTCOM: ABŞ iyulun 15-də İran limanlarının blokadasını bərpa edəcək

ABŞ Silahlı Qüvvələrinin Mərkəzi Komandanlığı (CENTCOM) iyulun 14-də saat 16:00-dan (Bakı vaxtı ilə iyulun 15-də saat 00:00) etibarən İran limanlarına qarşı dəniz blokadasını bərpa edəcəyini açıqlayıb. 

CENTCOM-un "X" sosial şəbəkəsində yaydığı məlumata görə, qüvvələr İran limanlarına və sahil ərazilərinə daxil olan və ya həmin ərazilərdən çıxan gəmilərə qarşı blokada tətbiq edəcək. Eyni zamanda, Hörmüz boğazı və Oman körfəzi vasitəsilə İranla əlaqəsi olmayan marşrutlar üzrə hərəkət edən gəmilərin sərbəst keçidinə maneə yaradılmayacaq. 

ABŞ bundan əvvəl aprelin 13-dən iyunun 18-dək İrana qarşı analoji dəniz blokadası tətbiq etmişdi. CENTCOM-un məlumatına görə, bu müddətdə 140-dan çox gəminin marşrutu dəyişdirilib, qaydaları pozduğu bildirilən doqquz gəmi sıradan çıxarılıb, humanitar yardım daşıyan 50-dən çox ticarət gəmisinin isə keçidinə icazə verilib. 

ABŞ Prezidenti Donald Tramp bazar günü Birləşmiş Ştatların İran limanlarının blokadasını yenidən tətbiq edəcəyini və Hörmüz boğazında təhlükəsizliyin təmin olunmasına görə ticarət gəmilərindən rüsum alınacağını bildirmişdi.