İran ABŞ hərbi əməliyyatları ilə bağlı Körfəz ölkələrinə xəbərdarlıq edib

ABŞ Silahlı Qüvvələrinin Mərkəzi Komandanlığının (CENTCOM) rəhbəri Bred Kuper Fars Körfəzi Ərəb Dövlətləri Əməkdaşlıq Şurasına üzv bəzi ölkələrin və İordaniyanın ABŞ-nin İrana qarşı hərbi əməliyyatlarında iştirak etdiyini bildirib. Bu barədə İran Xarici İşlər Nazirliyinin sözçüsü İsmayıl Bəqai "X" sosial şəbəkəsində yazıb. 

Bəqai bildirib ki, əgər ABŞ tərəfinin bu iddiası həqiqətə uyğun deyilsə, adıçəkilən ölkələr bunu rəsmi şəkildə təkzib etməlidirlər.

Onun sözlərinə görə, həmin ölkələrin ABŞ-nin hücumları üçün öz ərazilərindən istifadəyə imkan verməsi BMT Baş Assambleyasının 3314 saylı qətnaməsinə əsasən onları münaqişədə iştirakçı tərəfə çevirir və bu, BMT Nizamnaməsinin 2-ci maddəsinin 4-cü bəndində təsbit olunmuş gücdən istifadə etməmək prinsipinin, eləcə də mehriban qonşuluq prinsipinin pozulması kimi qiymətləndirilə bilər. Bəqai əlavə edib ki, bu halda İranın həmin ölkələrdə yerləşən ABŞ hərbi bazalarına və obyektlərinə qarşı özünümüdafiə hüququ yaranır. 

İran XİN sözçüsü bildirib ki, Tehran regionda təhlükəsizlik və sabitliyin bərpasını təmin etmək məqsədilə özünümüdafiə hüququndan istifadə etməyi zəruri hesab edir.

Fars Körfəzi Ərəb Dövlətləri Əməkdaşlıq Şurasına Səudiyyə Ərəbistanı, Birləşmiş Ərəb Əmirlikləri, Qətər, Küveyt, Bəhreyn və Oman daxildir.