Serbiya 2027-ci ilin sonuna qədər Şengen zonasına qoşulmağa hazır olmağı planlaşdırır

Serbiya 2027-ci ilin sonuna qədər Şengen zonasına qoşulmağa hazır olmağı və bunun üçün Avropa İttifaqının tələblərinə uyğun zəruri islahatları həyata keçirməyi planlaşdırır.

Bu barədə Serbiyanın Avropaya inteqrasiya naziri Nemanя Staroviç “Radio Belqrad”a müsahibəsində bildirib. Onun sözlərinə görə, hökumət artıq Daxili İşlər Nazirliyinin rəhbərlik etdiyi xüsusi işçi qrupu yaradıb və zəruri islahatların həyata keçirilməsi üçün plan təsdiqləyib.

Serbiyanın Şengen zonasına inteqrasiyası ölkənin viza siyasətinin Aİ qaydalarına uyğunlaşdırılmasını da tələb edə bilər. Serbiya parlamentinin müvafiq komitəsinin rəhbəri Draqan Stanoyeviç daha əvvəl Rusiya vətəndaşları üçün vizasız rejimin ləğv edilməsinin müzakirə olunduğunu bildirib.

Serbiya Prezidenti Aleksandr Vuçiç isə Rusiya ilə vizasız rejimin ləğv ediləcəyi barədə xəbərləri daha əvvəl təkzib edib.

Bu arada Monteneqro da Aİ-yə inteqrasiya çərçivəsində viza siyasətini İttifaqın qaydalarına uyğunlaşdırır. Ölkə hökumətinin qərarına əsasən, 1 noyabr 2026-cı ildən Rusiya və Belarus vətəndaşları ilə yanaşı Çin, Səudiyyə Ərəbistanı və Türkiyə vətəndaşlarının da Monteneqroya səfər üçün viza alması tələb olunacaq.

Monteneqronun bu addımı Aİ-yə üzvlük prosesində viza siyasətinin Avropa İttifaqının qaydaları ilə uyğunlaşdırılması çərçivəsində atılır.