İsveçrə Rusiyaya qarşı sanksiyaları genişləndirir

İsveçrə Federal Şurası Avropa İttifaqının (Aİ) Rusiyaya qarşı 20-ci sanksiyalar paketində nəzərdə tutulan əlavə tədbirləri tətbiq etmək qərarına gəlib.Bu barədə Federal Şuranın yaydığı press-relizdə bildirilib.

Yeni məhdudiyyətlər avqustun 20-dən qüvvəyə minəcək və əsasən mayeləşdirilmiş təbii qaz (LNG), ticarət və maliyyə sektorlarını əhatə edəcək.

Qərara əsasən, Rusiyanın LNG tankerlərinə və buzqıran gəmilərinə, eləcə də LNG terminallarına xidmət göstərilməsinə qadağa tətbiq olunacaq. Rusiyaya tanker satışına qadağa da qüvvəyə minib. Üçüncü ölkələrə tanker satışı ilə bağlı müqavilələrdə onların Rusiyaya yenidən satılmasını qadağan edən müddəa yer almalıdır.

Ticarət sahəsində İsveçrə sanksiyalardan yayınmanın qarşısını almaq məqsədilə yeni tədbirlər tətbiq edəcək.

Bundan əlavə, Rusiya ərazisində fəaliyyət göstərən kriptoaktiv platformalarından onların köçürülməsi və mübadiləsi üçün istifadə qadağan ediləcək. Rusiya kriptovalyutalarının, o cümlədən rəqəmsal rublun inkişafına dəstək göstərilməsi də məhdudlaşdırılacaq.

Federal Şura İsveçrə şirkətlərinin Rusiyada əqli mülkiyyət hüquqlarının qorunması və onların xarici məhkəmə qərarları ilə bağlı mümkün iddialardan müdafiəsi üçün əlavə tədbirlər də müəyyən edib.