Bakı- Qobustan yolunda toz fırtınası - Hərəkət çətinləşib - VİDEO

Bakı-Qobustan yolunda toz fırtınası nəqliyyatın hərəkətini çətinləşdirib, bu barədə görüntülər feysbukda yayılıb. 

 

Hadisə Bakı-Qazax yolunun Qobustan rayonu ərazisindən keçən hissəsində baş verib.

 

Bakı Şəhər Dövlət Yol Polisi (DYP) İdarəsi küləkli hava şəraiti ilə əlaqədar sürücülərə xəbərdarlıq edib. İdarənin baş inspektoru, polis mayoru Araz Əsgərli  bildirib ki, kəskin hava şəraiti ilə əlaqədar nəqliyyat vasitələri təhlükəli ərazilərdə park edilməməldir:

"Paytaxt ərazisində küləyin sürətinin normadan artıq olması sürücülər və hərəkətin digər iştirakçıları üçün təhlükəli vəziyyət yaradır. Sürücülərdən və piyadalardan son dərəcə ehtiyatlı olmasını, təhlükəsizlik qaydalarına ciddi əməl edilməsini, avtomobilləri çoxmərtəbəli binaların, ağacların altında saxlamamağı tövsiyə edirik. Eyni zamanda moped və motosikl tipli nəqliyyat vasitələrindən, eləcə də yük maşınlarından istifadə edən şəxslər hərəkətlərini məhdudlaşdırsınlar. Piyadalardan açıq havada hərəkətlərini mümkün qədər məhdudlaşdırmağı xahiş edirik”, - o bildirib. 

 

Hidrometeoroloji Proqnozlar Bürosunun direktoru Gülşad Məmmədova bildirib ki, qərb küləyinin sürəti Naftalanda 32 m/s, Gəncədə 24 m/s, Ağdam, Tərtərdə 22 m/s, Bərdədə 20 m/s, Qobustan, Şəmkirdə 18 m/s, Kəlvəzdə 17 m/s, Xaçmazda 15 m/s, Bakıda və Abşeron yarımadasında arabir 38 m/s-dək güclənib. Neft Daşları stansiyasının məlumatına əsasən, dalğanın hündürlüyü 2,6 metrə çatıb.

 

"Havanın temperaturu aprelin 3-də iqlim normasından 13.7 dərəcə yuxarı olub, maksimal temperatur Naxçıvan MR-da 24-30 dərəcə isti, dağlıq rayonlarda 25 dərəcəyədək isti, aran rayonlarında 31-36 dərəcə isti olub. Bakıda və Abşeron yarımadasında 24-27, Bakıda isə 30.1 dərəcə isti qeydə alınıb, lakin bu rekord göstərici deyil, çünki 2012-ci ildə Bakıda havanın maksimal temperaturu 31.5 dərəcəyədək yüksəlib”, - o deyib. 

Gülşad Məmmədovanın sözlərinə görə, aprelin 4-də ölkə ərazisində güclü şimal-qərb küləyi davam edəcək.

 

"Küləyin maksimal sürətinin bəzi yerlərdə arabir 33-38 m/s-dək çatacağı, 5-i səhər saatlarından zəifləyəcəyi, gündüz mülayim cənub küləyinin əsəcəyi gözlənilir", Məmmədova deyib.

 

Küləyin ölkə ərazisində yaratdığı fəsadlar barədə hazırda məlumat yoxdur.