Xaricdən gətirilən bəzi dərmanların satışı dayandırılıb

ANN.Az xəbər verir ki, bu barədə AzNews.az-a sakinlər məlumat veriblər. 

Sakinlərin şikayəti əsasında bir neçə aptekdə keçirdiyimiz sorğundan sonra məlum olub ki, artıq 10 gündür apteklərə xaricdə istehsal olunan dərmanların göndərilməsi dayandırılıb. Buna görə də, hətta xaricdə istehsal olunmuş, çox ucuz qiymətə satılan dərmanları da tapmaq mümkün deyil.

"Dərmanların qiymətində izah olunmayan artımlar var və bu günbəgün artmaqda davam edir. Xarici istehsal olan dərmanların satışının dayandırılmasının birinci səbəbi budur. İkinci səbəb isə bəzi dərman preparatlarının Azərbaycana gətirilməsinin sərfəli olmamasıdır. Məhz buna görə də, sahibkarlar həmin dərman preparatlarını Azərbaycana gətirmək istəmirlər. Dərman preparatları xarici ölkələrdən dollarla alınır. Dollar qalxdıqca, dərmanların da qiyməti qalxır”.

"Həkimlərin özlərinin də təsirinə və keyfiyyətinə güvəndiyi xeyli dərman preparatları artıq satışdan yığışdırılıb. Bu da həkimlərin işində xeyli problem yaradıb. Bu dərmanlara qarşı həkimlərdə xeyli inam vardı. Hesab edirəm ki, bunların qaydasına düşməsi üçün dərman preparatlarının Dövlət Reystri yaradılmalıdır. Bütün dərman preparatları qeydiyyata alınmalıdır. Sahibkarlar da xarici istehsal olan dərmanları Azərbaycana gətirib bazarla tənzimləməlidirlər. Bu məsələyə kənardan müdaxilə olduqca, problem daha da böyüyəcək”.