AMB: Bank sektoru əlavə 20,1 milyard manatlıq risk ölçülmüş aktiv artımını dəstəkləyə bilər

Azərbaycan bank sektorunun kapital adekvatlığı 2026-cı ilin birinci yarısının yekunlarına görə 17,7% təşkil edib. Bu göstərici bankların kapital mövqeyinin prudensial tələbləri üstələdiyini və sektorun əlavə risk ölçülmüş aktiv artımını dəstəkləmək imkanına malik olduğunu göstərir.

Bunu Azərbaycan Mərkəzi Bankının (AMB) Maliyyə Sabitliyi departamentinin direktoru Ataxan Həsənov bildirib.

Onun sözlərinə görə, bank sektorunun mövcud kapital mövqeyi risk üzrə ölçülmüş aktivlərin əlavə 20,1 milyard manat artımını dəstəkləməyə imkan verir.

2026-cı ilin birinci yarısının yekunlarına əsasən, sektor üzrə risk ölçülmüş aktivlərin cəmi aktivlərdə payı 66% təşkil edib.

Həsənov qeyd edib ki, kapital adekvatlığı əmsalı sistem əhəmiyyətli banklar üçün müəyyən edilmiş 12,5%-lik, digər banklar üçün isə 10,5%-lik minimum normativ tələbləri üstələyir.

O bildirib ki, kapital tələblərinin Bazel III standartlarına uyğunlaşdırılması çərçivəsində bank kapitalı və onun adekvatlığı üzrə yeni prudensial çərçivə 2027-ci il yanvarın 1-dən qüvvəyə minəcək.

Aytac